KULTURA ETA SORMEN TOPAKETAK
Espazio publikoa eta Sormen eta Kultura Adierazpena errealitate berrian
Euren bigarren edizioan, Kultura eta Sormen Topaketek honako hauxe izan nahi dute hizpide: eremu publikoa eta gaur egungo osasun-krisiak bertan gertatzen diren adierazpen kulturaletan duen eragina. Pandemiaren ondorioz, eremuen erabilerak birdiseinatu eta geure eguneroko jokabidea zein ohiturak birpentsatu behar izan ditugu. Jarduera kulturalari begira, krisi honen ondorioz, bertaratzen direnen kopurua murriztu egin da nabarmen, eta ekitaldiak, ikuskizunak eta proiektuak aldi baterako itxi edo bertan behera utzi dira. Hori dela eta, neurri handi batean eragotzi da jarduera profesionala..
Konfinamenduan eta normaltasun berrian, argi eta garbi geratu da sektore kultural eta sortzaileak (SKS) ezinbestekoak direla eta formula berriak behar dituztela, haien jarduera bateragarria izan dadin osasun-larrialdiarekin. Testuinguru horretan, esparru publikoa leheneratzeko, berrasmatzeko eta birdiseinatzeko lekua da, hau da, eremu irekiak, plazak, kaleak eta elkarrekin bizitzeko eta gizarteratzeko edozein eraikin edo gune.
Zorionez, jarduera kulturalak dira esparru publikoa eta esparru horretan dauden elementuak diseinatzen dituztenak eta bertan esku hartzen dutenak. Pentsamendua eraldatzen dute, espiritu kritikoa elikatzen dute, emozioen bidez lan egitean esperientzia bakarrak sortzen dituzte eta, horretarako, etengabeko elkarreragina dute ingurunearekin. Beraz, sektore kultural eta sortzailearen ezagutza metatua balio handiko baliabidea da eremu publikoari buruz hausnartzeko eta berrasmatzeko prozesuari begira.
Topaketa honetan, eztabaida-taldea egongo da, eta, bertan, GARAPENen aterkipean eta INNOBASQUEren laguntzarekin SKSak batera bultzatzeko eta sustatzeko asmoz bat egin duten udalerri eta eskualdeetako ekimen kultural eta sortzaileen zazpi esperientziak parte hartuko dute.
Ekitaldian izena ematea:
- Sarrera birtuala
- Sarrera presentziala (15 eserleku)
Programa
Kokapena
Hizlariak
ANTespacio 2010. urtean jaio zen Bilbon, kultura ekoizpenaren barruan proiektu esperimentalak sortzeko asmoarekin, egunerokotasunera eta eraldaketa sozialera lotuz. Arte garaikidearen hedapen eta dibulgaziorako modu berriak lantzen ditugu; horietan, sortzen diren prozesuak eta elkarrizketak funtsezko parte dira. Proiektu horiek hainbat forma har ditzakete; izan daitezke erakusketak, jaialdiak, topaketak, tailerrak, argitalpenak. Gure printzipioek lan kolaboratiboa eta sareak sortzea dute oinarri, iritzi kritikoak sortzeko eta sortzailearen eta ikuslearen arteko posizioak gerturatzeko.
Oraingo honetan ANTespacio entitateak ITURFEST jaialdia aurkeztuko du, azaroaren 20tik 27ra ospatuko dena, Bilbao Bizkaia Design Week astearekin batera. Kultura garaikideko jaialdia da, eta Iturralde auzoaren testuinguruan egiten da. Artistei gonbidapena egiten zaie proiektu zehatzak egin ditzaten, auzoarekin, auzoarentzat eta auzoarengatik, bertan bizi direnentzat zein bertatik ibiltzen direnentzat. Arte eta kultura garaikidea egunerokotasunera gerturatzea da ITURFESTen izateko arrazoia.
ElektrART sorkuntza estudio bat da, diziplina anitzeko artistek osatutakoa; arte eta teknologiaren hibridazio proiektuak diseinatzen eta martxan jartzen egiten dute lan. Sorkuntza prozesuei, ekoizpen prozesuei eta erakusketa prozesuei aplikatutako berrikuntza teknologiko etengabearen bitartez, arte proiektuak diseinatzen dituzte data analytics edo errealitate birtualaren bitartez, beste teknologia eta esperientzia artistiko batzuen artean, hiri espazioetan. Halaber, enpresa eta entitate berritzaileak indartzen laguntzen dute, eraldaketa sortzaileko prozesuen bitartez, eta kultura eta sorkuntza industriak benetan modernizatu eta berritzea lortzeko egiten dute lan.
eXperientziak diziplina anitzeko talde sortzaileak osatzen du, eta hezkuntza, aisialdi eta turismo esparruetan egin dute ibilbidea.
Bizipen pertsonalizatuak sortzen adituak gara.
Sortzen ditugun esperientzietan parte hartzen duten pertsonek mezuak modu dibertigarrian barneratzea da gure helburua.
Girabira Txikis del Bidasoa eta Ezmugak kolektiboen arteko kolaborazio proiektu bat da; urtero, udan hiriko parke nagusietatik ibilaldi bat egitean datza, Irun (bir)deskubritzeko helburuarekin, urtero aldatzen diren 4 jardunaldi tematikoen bitartez (zirkua, antzerkia, argazkilaritza...).
Horietan, parte hartzaileek musika (zuzeneko emanaldiak, dj saioak), ekintzak (jarduera parte hartzaileak, esaterako tailerrak) eta parkeak aurkitzen dituzte.
Bidenabar, Girabirak egitasmoak keinu bat egin nahi die picnic herrikoei, street food edo kaleko janari postuei, espazio publikoan otorduak egiteari sozializatzeko modu eta familia eta lagunekin elkartzeko modu gisa.
Programa 2015eko aurrekontu parte hartzaileen esparruan jaio bazen ere, hiriko parkeetan zuzeneko musika eta bazkari herrikoiak eskatzen zituzten gazteei lotuta, egia da publikoa gero eta anitzagoa eta belaunaldien artekoagoa dela.
Nire kasuan, natura lagungarria izan zait nire sentimenduak eta emozioak ulertzeko eta adierazteko, hainbat sorkuntzaren bitartez. Ikaspen horri esker, gaurko egunez nire bezeroen emozioak interpreta ditzaket eta zerbait ukigarri eta erreal bihur ditzaket, esaterako, bitxi bat.
Egiten dudan lan bakoitza, dela bitxigile, dela lore saltzaile, dela espazio naturalak publizitate edo ekitaldietarako prestatzeko diseinatzaile gisa, irakaspen pertsonal horri esker egin dezaket, lan mekanismo kontzientea sortzeko aukera eman baitit.
INspiraTU diziplina anitzeko sorkuntza artistikoko hezkuntza egitasmo bat da. Ikasteko proposamen kolaboratibo bat da, metodologia berritzaileekin, tresna sozial handigoak lortzera bideratutakoa; horrelakoetan artea ibilgailua da, eta sorkuntza da motorra. Diziplina anitzeko ko-sorkuntzako proiektu bat da (rapa, antzerkia, arte plastikoak, dantza urbanoa), Oinarrizko LHko ikasleekin. Nafarroako Gobernuko Hezkuntza Sailarekin hitzartuta, ikasleek eskola orduen barruan hartzen du parte prozesu artistiko honetan. Proiektuaren bosgarren edizioa da honako hau, eta ikasturtea hasi zenetik dinamikak COVID-19ak eragindako egoerara egokitu egin behar izan dira; tailerrak espazio itxietan egin beharrean, ikastetxeetatik gertu dauden zona irekietan egin dira: plazetan, Arga ibaiaren alboko parkeetan edo lorategietan. Egokitzapen honek balio gehigarri bat eman dio proiektuari; izan ere, ikasleek eta irakasleek oso balorazio positiboa egin dute dinamikak espazio natural irekietan egin izanaz.
Peace of Mind, dantza urbanoan espezializatutako konpainia bat da, eta 2017an sortu zen, Paula Pérez Pinillaren eta Carmina Gimeno Latasen eskutik. Dantza garaikidean eta bestelako arteetan baliabide berriak bilatzea lagungarria zaie lengoaia eta adierazpide propioa aurkitu eta handitzeko.
Peace of Mind konpainiak iraupen laburreko piezak ezohiko espazioetan hartzen dituzten jaialdiei esker ekin zion ibilbideari. Paula Pérez Pinilla eta Carmina Gimeno Latas dantza urbanoan espezializatutako dantzariak dira; dantza mota hori kale giroaren barruan kokatzen da, baina dantza garaikidearen ikuspegiak sorkuntza mailako ikuspegi berria eskaintzen die. Hala, esan daiteke konpainiak dantza edozein espaziotara egokitzean arreta berezia jarriz garatzen dituela proiektu guztiak.